ವರದಿ : ಬಿ.ಎಸ್.ಆಚಾರ್ಯ
ಬ್ರಹ್ಮಾವರ : ಪಲ್ಲಕಿ ಉತ್ಸವದಲ್ಲಿ ಪ್ರಖ್ಯಾತಿ ಪಡೆದ ಕೊಲಕಾಡಿ ಶ್ರೀ ಕಾಳಿಕಾಂಬಾ ದೇವಸ್ಥಾನದಲ್ಲಿ ನವರಾತ್ರಿ ಅಂಗವಾಗಿ ಪ್ರಥಮ ದಿನದಂದು ಇಲ್ಲಿನ ತೊರೆಯೊಂದರಿಂದ ಜಲವನ್ನು ತಂದು 9 ದಿನ ನವರಾತ್ರಿಗೆ ಕಲಶ ಮೂಲಕ ದೇವಿಯ ಪೂಜೆ ಮಾಡಿ 10 ನೇ ದಿನ ಕಲಶ ವಿಸರ್ಜನೆ ಅಂಗವಾಗಿ ಶನಿವಾರ ಬೀದಿ ಉತ್ಸವ ನಡೆದು ಬಳಿಕ ನಾನಾ ಧಾರ್ಮಿಕ ಕಾರ್ಯಕ್ರಮದೊಂದಿಗೆ ಕಲಶ ವಿಸರ್ಜನೆ ನಡೆಯಿತು.
ದೇವಿಯು ಪಲ್ಲಕಿಯಲ್ಲಿ ಸಂಚಾರ ಮಾಡುವಾಗ ಪಲ್ಲಕಿ ದೇವಿಯ ಅಣತಿಯಂತೆ ನಾನಾ ಭಾಗ ಸುತ್ತುವುದು ಇಲ್ಲಿನ ವಿಶೇಷ . ಶನಿವಾರ ಕೂಡಾ ದೇವಸ್ಥಾನದಿಂದ 2 ಕಿ.ಮೀ ದೂರದ ತನಕ ಪಲ್ಲಕಿ ಮೂಲಕ ಸಾಗುವಾಗ ನಾನಾ ಭಜನಾ ತಂಡದಿಂದ ಭಜನೆ ವಾದ್ಯ ಮೇಳದ ಮೂಲಕ ವಾಪಾಸು ಬರುವಾಗ ಊರಿನ ಜನರು ಭಕ್ತಿ ಪೂರ್ವಕವಾಗಿ ಪೂಜಾ ಸೇವೆಯನ್ನು ನೀಡುತ್ತಾರೆ.
ಪಲ್ಲಕಿಗೆ ಹೆಗಲು ಕೊಡುವವರು ಕೆಲವು ದಿನದಿಂದ ವೃತಾಚಾರಣೆಯಿಂದ ಇರಬೇಕಾದ ನಿಯಮ ಇಲ್ಲಿದೆ.
ಶನಿವಾರ ಕೂಡಾ ಪಲ್ಲಕಿಯಲ್ಲಿ ಬರುವಾಗ ದಾರಿ ಮದ್ಯೆ ಕೆಲವು ಭಾಗದಲ್ಲಿ ಪಲ್ಲಕಿ ಯಾವ ಭಾಗಕ್ಕೆ ಸಾಗುತ್ತದೆ ಎನ್ನುವುದು ಪಲ್ಲಕಿ ಹೊತ್ತವರಿಗೆ ಅರಿವಿರದೆ ನಾನಾ ಭಾಗಕ್ಕೆ ಸಂಚರಿಸಿದೆ.
ಬಳಿಕ ದೇವಸ್ಥಾನದಲ್ಲಿ ಮಹಾ ಪೂಜೆ ಜರುಗಿತು . ನೂರಾರು ಭಕ್ತರು ಭಾಗವಹಿಸಿದ್ದರು.