ರೋಮ್: ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೊನಿ ಅವರು ತಮ್ಮ ಸಹಜೀವನ ಸಂಗಾತಿ ಆಂಡ್ರಿಯಾ ಗಿಯಾಂಬ್ರುನೊ ಅವರಿಂದ ದುರವಾಗಿದ್ದಾರೆ. ತಮ್ಮ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಈ ಕುರಿತು ಅವರು ಮಾಹಿತಿ ನೀಡಿದ್ದಾರೆ. ಕಳೆದ ಹತ್ತು ವರ್ಷಗಳ ತಮ್ಮ ಸಂಬಂಧ ಕೊನೆಗೊಂಡಿದೆ ಎಂದು ಅವರು ಬರೆದುಕೊಂಡಿದ್ದಾರೆ.
ಟಿವಿ ಪತ್ರಕರ್ತನಾಗಿರುವ ಗೆಳೆಯ ಆಂಡ್ರಿಯಾ ಗಿಯಾಂಬ್ರುನೊ ಅವರು ಇತ್ತೀಚಿನ ಟಿವಿ ಶೋವೊಂದರಲ್ಲಿ ಮಹಿಳೆಯರ ಬಗ್ಗೆ ಆಕ್ಷೇಪಾರ್ಹ ಕಾಮೆಂಟ್ ಮಾಡಿದ ಹಿನ್ನೆಲೆಯಲ್ಲಿ ಆಂಡ್ರಿಯಾ ಜೊತೆಗಿನ ಸಂಬಂಧವನ್ನು ಮುರಿದುಕೊಳ್ಳುತ್ತಿರುವುದಾಗಿ ಪ್ರಧಾನಿ ಮೆಲೋನಿ ಬಹಿರಂಗಪಡಿಸಿದ್ದಾರೆ.
“ಆಂಡ್ರಿಯಾ ಗಿಯಾಂಬ್ರುನೊ ಅವರೊಂದಿಗಿನ ನನ್ನ ಹತ್ತು ವರ್ಷಗಳ ಸಂಬಂಧ ಕೊನೆಗೊಂಡಿದೆ. ಕಾಲಕ್ಕೆ ತಕ್ಕಂತೆ ನಾವು ಸಾಗುವ ನಮ್ಮಿಬ್ಬರ ಹಾದಿಗಳು ಬದಲಾಗಿವೆ. ಅದನ್ನು ಗುರುತಿಸುವ ಸಮಯ ಬಂದಿದೆ’ ಎಂದು ಅವರು ಪೋಸ್ಟ್ನಲ್ಲಿ ಹೇಳಿದ್ದಾರೆ.
ಕೋಲಾಹಲ ಸೃಷ್ಠಿಸಿದ್ದ ಆಂಡ್ರಿಯಾ ಹೇಳಿಕೆ :
ಕೆಲವು ತಿಂಗಳ ಹಿಂದೆ, ದೇಶದಲ್ಲಿ ಬೆಳಕಿಗೆ ಬಂದ ಸಾಮೂಹಿಕ ಅತ್ಯಾಚಾರ ಘಟನೆಗಳ ಬಗ್ಗೆ ಆಂಡ್ರಿಯಾ ನೀಡಿದ್ದ ಹೇಳಿಕೆ ವಿಶ್ವದಾದ್ಯಂತ ಕೋಲಾಹಲ ಸೃಷ್ಠಿಸಿತ್ತು. ಟಿವಿ ಚಾನೆಲ್ನೊಂದಿಗೆ ಮಾತನಾಡುತ್ತಾ, ಗಿಯಾಂಬ್ರುನೋ , ನೀವು ಮೋಜು ಮಸ್ತಿ ಮಾಡಲು ಹೋದಾಗ, ನೀವು ಸಿಕ್ಕಾಪಟ್ಟೆ ಕುಡಿಯುತ್ತೀರಿ. ನಿಮಗೆ ಕುಡಿಯುವ ಹಕ್ಕಿದೆ, ಆದರೆ ಅಷ್ಟೊಂದು ಕುಡಿದಾಗ ಇಂತಹ ತೊಂದರೆಗೆ ಸಿಲುಕುತ್ತೀರಿ, ಕುಡಿತು ಪ್ರಜ್ಞೆ ಕಳೆದುಕೊಳ್ಳುವುದನ್ನ ತಪ್ಪಿಸಿದರೆ ಇಂತಹ ಸಮಸ್ಯೆಗಳಿಂದ ತಪ್ಪಿಸಿಕೊಳ್ಳಬಹುದು’ ಎಂದು ಕಾಮೆಂಟ್ ಮಾಡಿದ್ದಾರೆ.
ಅವರು ಈ ಹೇಳಿಕೆ ತೀವ್ರ ಟೀಕೆಗೆ ಗುರಿಯಾಗುತ್ತಿದ್ದಂತೆ, ‘ಯುವಕರಿಗೆ ಕುಡಿತ, ಡ್ರಗ್ಸ್ ಸೇವನೆ ಮಾಡಬೇಡಿ ಎಂದು ಹೇಳುವುದು ನನ್ನ ಉದ್ದೇಶ. ಸಮಾಜದ ಹೊರಗಿರುವ ಕೆಟ್ಟವರಿಂದ ದೂರವಿರಲು ಎಚ್ಚರದಿಂದಿರಿ ಎಂದು ಸಲಹೆ ನೀಡಿದ್ದೆ ಎಂದು ಸಮರ್ಥಿಸಿಕೊಳ್ಳಲು ಗಿಯಾಂಬ್ರುನೋ ಪ್ರಯತ್ನಿಸಿದ್ದರು.
ಇತ್ತೀಚೆಗಷ್ಟೇ ತಮ್ಮ ಮಹಿಳಾ ಉದ್ಯೋಗಿಗಳ ವಿರುದ್ಧ ಅವಹೇಳನಕಾರಿ ಪದ ಬಳಕೆ ಮಾಡಿ ನಿಂದಿಸಿರುವ ಆಡಿಯೋಗಳು ವೈರಲ್ ಆಗಿದ್ದವು.
ಜಾರ್ಜಿಯಾ ಮೆಲೋನಿ ಇಟಲಿಯ ಮೊದಲ ಮಹಿಳಾ ಪ್ರಧಾನ ಮಂತ್ರಿ. ಕಳೆದ ವರ್ಷ ಬ್ರದರ್ಸ್ ಆಫ್ ಇಟಲಿ ಪಕ್ಷದ ಪರವಾಗಿ ಜವಾಬ್ದಾರಿ ವಹಿಸಿಕೊಂಡು ಇತಿಹಾಸ ನಿರ್ಮಿಸಿದ್ದರು. ಈ ಜೋಡಿಗೆ 7 ವರ್ಷದ ಒಬ್ಬ ಮಗಳಿದ್ದಾಳೆ.