ಬೆಂಗಳೂರು: ಇನ್‌ಸ್ಟಾ ಗ್ರಾಂನ ವಿಕ್ಕಿಪೀಡಿಯಾ, ಹಲವು ರೀಲ್ಸ್‌ಗಳ ಮೂಲಕ ಟ್ರೆಂಡ್ ಸೆಟ್ ಮಾಡಿದ್ದಾರೆ. ಈಗ ರಾಜ್ಯಾದ್ಯಂತ ಜನರು ನೀರಿಲ್ಲದೇ ತತ್ತರಿಸಿ ಹೋಗಿದ್ದಾರೆ. ಸಾಕಷ್ಟು ಹಣ ಕೊಟ್ಟರೂ, ನೀರು ಸಿಗದಂತಾದ ಪರಿಸ್ಥಿತಿ ಕರ್ನಾಟಕದಲ್ಲಿ ಉದ್ಭವವಾಗಿದೆ. ಈ ಸ್ಥಿತಿಯನ್ನು ನೋಡಿ ವಿಕ್ಕಿಪೀಡಿಯಾ ಹೊಸದೊಂದು ಹಾಡು ರೆಡಿ ಮಾಡಿದ್ದಾರೆ.
ಈ ಹಿಂದೆ ಏನಿಲ್ಲ ಏನಿಲ್ಲ ಹಾಡನ್ನು ತಮ್ಮದೇ ಆದ ಶೈಲಿಯಲ್ಲಿ ಕ್ರಿಯೇಟ್ ಮಾಡಿ ‘ರಾಹುಲ್‍’ನನ್ನು ಫೇಮಸ್ ಮಾಡಿದ್ದ ಮತ್ತು ನಾನು ನಂದಿನಿ ಹಾಡಿನ ಮೂಲಕ ಕೋಟಿ ಕೋಟಿ ಜನರನ್ನು ಸೆಳೆದಿದ್ದ ವಿಕ್ಕಿಪೀಡಿಯಾ, ‘ಏನಿಲ್ಲ ಏನಿಲ್ಲ’ ಹಾಡನ್ನೇ ‘ಓ ನಲ್ಲ ನೀರಿಲ್ಲ’ ಎಂದು ಸಾಹಿತ್ಯ ಬರೆದು ವಿಡಿಯೋವೊಂದನ್ನು ಮಾಡಿದ್ದಾರೆ. ಆ ವಿಡಿಯೋ ಕೂಡ ವೈರಲ್ ಆಗಿದೆ.
ಈ ಹಾಡಿನಲ್ಲಿ ಓ ನಲ್ಲ ನೀರಿಲ್ಲ, ಕುಡಿಯೋಕೆ ತೊಳಿಯೋಕೆ ನೀರಿಲ್ಲ.. ಸ್ನಾನಕ್ಕೆ ಬಟ್ಟೆಗೆ ನೀರಿಲ್ಲ ಎನ್ನುವ ಕ್ಯಾಚಿ ಸಾಹಿತ್ಯವು ಈ ಹಾಡಿನಲ್ಲಿದೆ. ವಿಕ್ಕಿ ಮತ್ತು ಅವನ ಗೆಳೆಯ ಈ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಸಂಪು, ನಲ್ಲಿ ಹೀಗೆ ನೀರು ಬರುವ ಅಥವಾ ಸಂಗ್ರಹಿಸುವ ಸ್ಥಳಗಳಲ್ಲಿ ನೀರು ಇಲ್ಲ ಎನ್ನುವುದನ್ನು ಹಾಡಿನಲ್ಲಿ ತೋರಿಸಿದ್ದಾರೆ.
ಈ ರೀಲ್ಸ್‌ಗೆ ಸಾಕಷ್ಟು ಲೈಕ್ಸ್ ಬಂದಿದ್ದು, ವೀಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿದೆ.
