ಕೋಟ: ಜಾಗದ ಪಾಲು ವಿಚಾರಕ್ಕೆ ಮಹಿಳೆ ಮೇಳೆ ಹಲ್ಲೆ, ಜೀವ ಬೆದರಿಕೆ

ಕೋಟ : ಜಾಗದ ವಿಚಾರಕ್ಕೆ ಸಂಬಂಧಿಸಿ ಮಹಿಳೆಯೊಬ್ಬರಿಗೆ ಅವಾಚ್ಯ ಶಬ್ದಗಳಿಂದ ಬೈದು ಹಲ್ಲೆ ನಡೆಸಿ ಜೀವ ಬೆದರಿಕೆ ಹಾಕಿರುವ ಬಗ್ಗೆ ಕೋಟ ಠಾಣಾ ವ್ಯಾಪ್ತಿಯ ಪಡುಕೆರೆ ಗ್ರಾಮದಲ್ಲಿ ವರದಿಯಾಗಿದೆ.
ಮೇ 17 ರಂದು ಬ್ರಹ್ಮಾವರದ ಪಡುಕೆರೆ ಗ್ರಾಮದ ಮಣೂರುವಿನ ಸರೋಜ ಎನ್ ಮೆಂಡನ್ ಅವರ ಮನೆಗೆ ಬಂದ ಅವರ ಗಂಡನ ಚಿಕ್ಕಮ್ಮ ಶಶಿಕಲ ಹಾಗೂ ಅವರ ಮಗ ಆದರ್ಶ ರವರು ದೇವರ ಕೆಲಸದ ವಿಚಾರವಾಗಿ ಕುಟುಂಬಸ್ಥರು ಚರ್ಚಿಸುವ ಸಲುವಾಗಿ ಬರಲು ಹೇಳಿದ್ದರು. ಅದರಂತೆ ಇವರು, ಪಡುಕೆರೆ ಗ್ರಾಮದ ರಾಮಚಂದ್ರ ಎಂಬುವವರ ಮನೆಯ ಬಳಿ ಹೋದಾಗ ಅಲ್ಲಿ ಆರೋಪಿತರಾದ ಶಶಿಕಲ, ಆದರ್ಶ, ಮತ್ತೊಬ್ಬ ಚಿಕ್ಕಮ್ಮ ಪಾರ್ವತಿ ಹಾಗೂ ಅವರ ಮಗ ನಿಖಿಲ್ ಬಂದಿದ್ದು, ಅವರೆಲ್ಲರೂ ಜಾಗದ ಪಾಲು ವಿಚಾರದ ಬಗ್ಗೆ ಮಾತನಾಡಲು ಪ್ರಾರಂಭಿಸಿದ್ದರು. ಈ ವೇಳೆ ಸರೋಜ ಅವರು “ನಾನು ದೇವರ ಕೆಲಸದ ಬಗ್ಗೆ ಮಾತನಾಡಲು ಬಂದಿದ್ದು, ಪಾಲಿನ ಬಗ್ಗೆ ನನ್ನ ಗಂಡನಲ್ಲಿ ಮಾತನಾಡಿ” ಎಂದಾಗ ಆರೋಪಿತರೆಲ್ಲರೂ ಸರೋಜ ಅವರನ್ನು ತಡೆದು ನಿಲ್ಲಿಸಿ ಅವಾಚ್ಯ ಶಬ್ದಗಳಿಂದ ಬೈದು ಹಲ್ಲೆ ಮಾಡಿದ್ದಾರೆ. ಅಲ್ಲದೆ ಮೇ 18 ರಂದು ಮತ್ತೆ ಸರೋಜ ಅವರ ಮೈದುನ ಪ್ರಶಾಂತ ಮೆಂಡನ್ ಹಾಗೂ ಆದರ್ಶ ರವರು ಮನೆಗೆ ಅಕ್ರಮ ಪ್ರವೇಶ ಮಾಡಿ ಹಲ್ಲೆ ಮಾಡಿ ಜೀವ ಬೆದರಿಕೆ ಹಾಕಿರುವುದಾಗಿ ನೀಡಿದ ದೂರಿನಂತೆ ಕೋಟ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.