ಮಣಿಪಾಲ : ನಕಲಿ ಟ್ರೇಡಿಂಗ್ ಆ್ಯಪ್ ಮುಖಾಂತರ ಲಕ್ಷಾಂತರ ರೂಪಾಯಿ ವಂಚಿಸಿರುವ ಘಟನೆ ನಡೆದಿದೆ.
ಮಣಿಪಾಲ ವಿದ್ಯಾರತ್ನ ನಗರದ ಜಾಸ್ಮಿ ಟಿ.ಕೆ.(34) ಎಂಬವರು ಫೇಸ್ ಬುಕ್‌ನಲ್ಲಿ ಆನ್ಲೈನ್ ಜಾಬ್ ಬಗ್ಗೆ ಜಾಹೀರಾತು ಒಪ್ಪಿಕೊಂಡಿದ್ದಾರೆ. ವಾಟ್ಸ್ ಆಪ್ ಮೂಲಕ ಜಾಸ್ಮಿ ಅವರಿಗೆ ಓರ್ವ ವ್ಯಕ್ತಿ ಮೆಸೇಜ್ ಮಾಡಿ ಚಾಟ್ ಮಾಡಿದ್ದಾರೆ. ಬಳಿಕ ಟೆಲಿಗ್ರಾಂ ಆ್ಯಪ್ ಸಂಪರ್ಕಿಸುವಂತೆ ತಿಳಿಸಿ ಲಿಂಕ್ ನೀಡಿದ್ದಾರೆ.
ಬಳಿಕ ಲಿಂಕ್ ಮುಖಾಂತರ ಟಾಸ್ಕ್ ನೀಡಲಾಗಿದೆ. ಜ.11 ರಂದು ಜಾಸ್ಮಿ ಒಟ್ಟು 1,88,000 ರೂ. ಹಣವನ್ನು ಮಹೇಶ್ ಎಂಬಾತನ ಬ್ಯಾಂಕ್ ಖಾತೆಗೆ ಜಮೆ ಮಾಡಿದ್ದಾರೆ.
ಬಳಿಕ ಆರೋಪಿಯು 1,50,000 ರೂ.ನೀಡಿದರೆ ಎಲ್ಲಾ ಹಣವನ್ನು ರೀಫಂಡ್ ಮಾಡುವುದಾಗಿ ತಿಳಿಸಿದ್ದಾರೆ. ಆರೋಪಿಯು ಹಣ ವರ್ಗಾವಣೆ ಮಾಡಿಕೊಂಡು ವಂಚಿಸಿರುವ ಬಗ್ಗೆ ಮಣಿಪಾಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.