ಹೊಸ ದಿಲ್ಲಿ : ಭೂಮಿಯ ಉತ್ತರ ಗೋಳಾರ್ಧವು ಮುಂದಿನ ವರ್ಷ ಅತಿ ಪ್ರಬಲ ಎಲ್ ನಿನೋಗೆ ಸಾಕ್ಷಿಯಾಗಲಿದೆ. 2024ರ ಮಾರ್ಚ್‌ನಿಂದ ಮೇ ವರೆಗೆ ಈ ಹವಾಮಾನ ಪರಿಸ್ಥಿತಿ ಎದುರಾಗಲಿದೆ ಎಂದು ಹೇಳಲಾಗಿದೆ. ಏಕೆಂದರೆ, ಸೂಪರ್ ಎಲ್ ನಿನೋ ಪರಿಸ್ಥಿತಿ ಉಂಟಾದಾಗ ಜಾಗತಿಕವಾಗಿ ಹವಾಮಾನ ವೈಪರಿತ್ಯ ಉಂಟಾಗಲಿದೆ.
ದಕ್ಷಿಣ ಅಮೆರಿಕ ಖಂಡದ ಬಳಿ ಪೆಸಿಫಿಕ್ ಸಾಗರದಲ್ಲಿ ಉಷ್ಣಾಂಶ ಏರಿಕೆ ಆಗುವ ಪ್ರಕ್ರಿಯೆಯನ್ನು ಎಲ್ ನಿನೋ ಎನ್ನುತ್ತಾರೆ. ಈ ಪರಿಸ್ಥಿತಿ ಉಂಟಾದಾಗ ವಿಶ್ವಾದ್ಯಂತ ಇದರ ಪರಿಣಾಮ ಕಾಣ ಸಿಗುತ್ತದೆ.
ಆಹಾರ ಪದಾರ್ಥಗಳ ಉತ್ಪಾದನೆ, ನೀರಿನ ಲಭ್ಯತೆ, ಜನರು ಹಾಗೂ ಪರಿಸರದ ಮೇಲೂ ಎಲ್ ನಿನೋ ಗಂಭೀರ ಪರಿಣಾಮ ಬೀರುತ್ತದೆ.
ಮುಂದಿನ ವರ್ಷ ಅತಿ ಪ್ರಬಲ ಎಲ್ ನಿನೋ ಸಂಭವಿಸುವ ಪ್ರಮಾಣ ಶೇ. 75 ರಿಂದ ಶೇ. 80ರಷ್ಟು ಇದೆ ಎಂದು ಅಂದಾಜಿಸಲಾಗಿದೆ. ಸಮುದ್ರದ ತಾಪಮಾನ ಸರಾಸರಿಗಿಂತಲೂ ಕನಿಷ್ಟ 1.5 ಡಿಗ್ರಿ ಸೆಲ್ಶಿಯಸ್‌ನಷ್ಟು ಏರಿಕೆ ಆಗಲಿದೆ.
ಜಾಗತಿಕವಾಗಿ ಸಮುದ್ರದ ತಾಪಮಾನ 2 ಡಿಗ್ರಿ ಸೆಲ್ಶಿಯಸ್‌ನಷ್ಟು ಏರಿಕೆ ಆಗುವ ಸಾಧ್ಯತೆ ಶೇ. 30ರಷ್ಟು ಇದೆ. ಒಂದು ವೇಳೆ ಈ ರೀತಿ ಆದರೆ ಅದು ಇತಿಹಾಸದಲ್ಲೇ ಪ್ರಬಲ ಎಲ್ ನಿನೋ ಆಗಲಿದೆ. ಇದೇ ರೀತಿಯ ಸನ್ನಿವೇಶ 1997 – 98 ಹಾಗೂ 2015 – 16ರಲ್ಲಿಯೂ ಆಗಿತ್ತು. ಈ ಪರಿಣಾಮವಾಗಿ ಜಾಗತಿಕವಾಗಿ ಬರ, ಪ್ರವಾಹ, ಮಳೆ ಕೊರತೆ, ವಿಪರೀತ ಮಳೆ ಸೇರಿದಂತೆ ಹಲವು ವೈಪರಿತ್ಯಗಳು ಜಗತ್ತಿನಾದ್ಯಂತ ಉಂಟಾಗಿತ್ತು.
ಒಂದೊಂದು ಪ್ರದೇಶದಲ್ಲಿ ಎಲ್ ನಿನೋ ಪ್ರಭಾವ ಒಂದೊಂದು ರೀತಿ ಇರುತ್ತದೆ. ಉತ್ತರ ಅಮೆರಿಕದಲ್ಲಿ ಅತಿ ಪ್ರಬಲ ಎಲ್ ನಿನೋದಿಂದಾಗಿ ಒಣ ಹವೆ, ಸರಾಸರಿಗಿಂತಾ ಉಷ್ಣಾಂಶ ಏರಿಕೆ ಆಗುತ್ತದೆ. ಅಮೆರಿಕದ ದಕ್ಷಿಣ ಭಾಗದಲ್ಲಿ ಶೀತ ಮಾರುತ, ಉಷ್ಣಾಂಶ ಕುಸಿತ ಆಗುತ್ತದೆ.
ಹೇಗಿರಲಿದೆ ಭಾರತದ ಮೆಲೆ ಸೂಪರ್ ಎಲ್ ನಿನೋ ಪ್ರಭಾವ?
ಭಾರತದಲ್ಲಿ ಎಲ್ ನಿನೋ ಪ್ರಭಾವ ಇದ್ದಾಗಲೆಲ್ಲಾ ಮುಂಗಾರು ದುರ್ಬಲವಾಗುತ್ತದೆ. ಒಣ ಹವೆ, ಒಣ ಗಾಳಿ ಬೀಸುತ್ತದೆ. ಹೀಗಾಗಿ ಮಳೆ ಕಡಿಮೆ ಆಗುತ್ತದೆ. ಒಂದು ವೇಳೆ ಸೂಪರ್ ಎಲ್ ನಿನೋ ಉಂಟಾದರೆ, ಭಾರತದಲ್ಲಿ ಹವಾಮಾನ ವೈಪರಿತ್ಯ ತಾರಕಕ್ಕೇರುತ್ತೆ. ಕೆಲವೆಡೆ ಮಳೆಯೇ ಇಲ್ಲವಾದ್ರೆ, ಇನ್ನೂ ಕೆಲವೆಡೆ ವಿಪರೀತ ಮಳೆ ಆಗುತ್ತದೆ. ಪ್ರವಾಹ ಒಂದೆಡೆಯಾದರೆ, ಮತ್ತೊಂದೆಡೆ ವಿಪರೀತ ಬರ ಪರಿಸ್ಥಿತಿ ಎದುರಾಗುತ್ತೆ.
ಉತ್ತರ ಭಾರತಕ್ಕೆ ಹೋಲಿಕೆ ಮಾಡಿದರೆ ದಕ್ಷಿಣ ಭಾರತದಲ್ಲಿ ಎಲ್ ನಿನೋ ಪ್ರಭಾವ ಕಡಿಮೆ ಎನ್ನಬಹುದಾದರೂ ಐತಿಹಾಸಿಕವಾಗಿ ಎಲ್ ನಿನೋ ಪ್ರಭಾವ ಇರುವ ಜಲ ವರ್ಷಗಳಲ್ಲಿ ಮಳೆ ಕೊರತೆ ಕಾಡುತ್ತದೆ. ಹಾಗೆ ನೋಡಿದರೆ, ಈ ವರ್ಷವೇ ರಾಜ್ಯದಲ್ಲಿ ಮಳೆ ಕೊರತೆ ಎದುರಾಗಿದೆ. ಪರಿಸ್ಥಿತಿ ಮುಂದಿನ ವರ್ಷವೂ ಮುಂದುವರೆಯಬಹುದಾ ಅನ್ನೋ ಭೀತಿ ಎದುರಾಗಿದೆ.
