ಸಿಯೋಲ್ (ದಕ್ಷಿಣ ಕೊರಿಯಾ) : ಇಂತಹುದೊಂದು ವಿಚಿತ್ರ ವಿದ್ಯಮಾನ ನಡೆದಿದೆ. ಹೌದು, ರೋಬೋಟ್ ಒಂದು ಮನುಷ್ಯನನ್ನು ಕೊಂದು ಹಾಕಿದೆ. ಈ ಘಟನೆ ನಡೆದಿರೋದು ದಕ್ಷಿಣ ಕೊರಿಯಾ ದೇಶದಲ್ಲಿ. ತರಕಾರಿಯ ಪೆಟ್ಟಿಗೆ ಹಾಗೂ ಮನುಷ್ಯನ ನಡುವಣ ವ್ಯತ್ಯಾಸ ಗುರುತಿಸುವಲ್ಲಿ ವಿಫಲವಾದ ರೋಬೋಟ್ ಯಂತ್ರವು ಮನುಷ್ಯನನ್ನು ಕೊಂದು ಹಾಕಿದೆ ಎಂದು ದಕ್ಷಿಣ ಕೊರಿಯಾದ ಸ್ಥಳೀಯ ಸುದ್ದಿ ಸಂಸ್ಥೆ ಯೋನ್‌ಹಾಪ್ ವರದಿ ಮಾಡಿದೆ.
ಮೃತ ವ್ಯಕ್ತಿಯನ್ನು ರೋಬೋಟಿಕ್ ಕಂಪನಿಯ ನೌಕರ ಎಂದು ಗುರುತಿಸಲಾಗಿದೆ. ಈತ 40 ವರ್ಷ ವಯಸ್ಸಿನವನಾಗಿದ್ದು, ಕೃಷಿ ಉತ್ಪನ್ನಗಳ ವಿತರಣಾ ಕೇಂದ್ರದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಎಂದು ತಿಳಿದು ಬಂದಿದೆ.
ಕೃಷಿ ಉತ್ಪನ್ನ ಎಂದು ತಿಳಿದ ರೋಬೋಟ್ :
ಕೈಗಾರಿಕಾ ಪ್ರದೇಶದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ‘ಯಂತ್ರ ಮಾನವ’ ದೊಡ್ಡ ದೊಡ್ಡ ಪೆಟ್ಟಿಗೆಗಳಿಗೆ ಕೃಷಿ ಉತ್ಪನ್ನಗಳನ್ನು ತುಂಬಿ ಅದನ್ನು ಸಾಲಾಗಿ ಜೋಡಿಸುವ ಕೆಲಸ ಮಾಡುತ್ತಿತ್ತು. ತನ್ನ ಕಾರ್ಯ ನಿರ್ವಹಣೆ ವೇಳೆ ರೊಬೋಟ್ ಬಳಿಗೆ ಹೋಗಿದ್ದ ವ್ಯಕ್ತಿಯನ್ನು ರೋಬೋಟ್ ಕೃಷಿ ಉತ್ಪನ್ನದ ಪೆಟ್ಟಿಗೆ ಎಂದು ಭಾವಿಸಿತ್ತು.
ವ್ಯಕ್ತಿಯೊಬ್ಬನನ್ನು ಕೃಷಿ ಉತ್ಪನ್ನಗಳ ಪೆಟ್ಟಿಗೆ ಎಂದು ರೋಬೋಟ್ ಭಾವಿಸೋಕೆ ಹೇಗೆ ಸಾಧ್ಯ ಎಂದು ತನಿಖಾಧಿಕಾರಿಗಳು ಇದೀಗ ರೊಬೋಟಿಕ್ ಸಂಸ್ಥೆಗೆ ಸವಾಲೆಸೆದಿದೆ. ರೋಬೋಟ್‌ನಲ್ಲಿ ತಾಂತ್ರಿಕ ದೋಷ ಏನಾದ್ರೂ ಆಗಿತ್ತಾ ಎಂಬ ಪತ್ತೆ ಕಾರ್ಯ ಕೂಡಾ ನಡೆಯುತ್ತಿದೆ. ಪ್ರಾಥಮಿಕ ವರದಿಗಳ ಪ್ರಕಾರ ರೋಬೋಟ್‌ನ ಒಂದು ಕೈ, ಮಾನವನನ್ನು ತರಕಾರಿ ಪೆಟ್ಟಿಗೆಯನ್ನು ಎಂದು ಭಾವಿಸಿತ್ತು ಎಂದು ತಿಳಿದು ಬಂದಿದೆ. ಈ ರೋಬೋಟ್ ಅನ್ನು ಪೆಟ್ಟಿಗೆಯನ್ನು ಎತ್ತಿ ಅದರಲ್ಲಿ ಕೃಷಿ ಉತ್ಪನ್ನ ತುಂಬಿಸಿ ಪಕ್ಕಕ್ಕಿಡುವ ರೀತಿ ಪ್ರೋಗ್ರಾಮಿಂಗ್ ಮಾಡಲಾಗಿತ್ತು ಎಂದು ರೋಬೋಟಿಕ್ ಸಂಸ್ಥೆ ತಿಳಿಸಿದೆ.
ಈ ರೀತಿ ರೋಬೋಟ್ ಕಾರ್ಯ ನಿರ್ವಹಿಸುವ ವೇಳೆ ರೋಬೋಟ್ ಸನಿಹಕ್ಕೆ ಬಂದ ವ್ಯಕ್ತಿಯನ್ನು ರೋಬೋಟ್‌ನ ಕೈ ತಳ್ಳಿತು. ಈ ವೇಳೆ ಯಂತ್ರದ ಬೆಲ್ಟ್‌ ಬಳಿ ಆತ ಸಿಲುಕಿಕೊಂಡ. ಈ ವೇಳೆ ಆತನ ದೇಹದ ಮೇಲ್ಭಾಗವು ಬೆಲ್ಟ್‌ಗೆ ಸಿಲುಕಿತ್ತು. ಆತನ ಮುಖ ಹಾಗೂ ಎದೆ ಭಾಗ ರೋಬೋಟ್‌ನ ಕೈಗೆ ಸಿಲುಕಿ ಸಂಪೂರ್ಣವಾಗಿ ನಜ್ಜುಗುಜ್ಜಾಗಿತ್ತು.
ಇನ್ನು ಮೃತ ವ್ಯಕ್ತಿ ರೊಬೋಟ್ ಬಳಿ ಹೋಗಿದ್ದು ಏಕೆ ಎಂಬ ಕುರಿತಾಗಿಯೂ ತನಿಖೆ ನಡೆಯುತ್ತಿದೆ. ಈ ಕುರಿತಂತೆ ರೋಬೋಟಿಕ್ ಸಂಸ್ಥೆಯು ಮಾಧ್ಯಮಗಳ ಜೊತೆ ಮಾಹಿತಿ ಹಂಚಿಕೊಂಡಿದೆ. ರೊಬೋಟ್ ಯಂತ್ರವನ್ನು ಕಾಳು ಮೆಣಸು ವರ್ಗೀಕರಿಸುವ ಘಟಕದಲ್ಲಿ ನಿಯೋಜನೆ ಮಾಡಲಾಗಿತ್ತು. ಮೃತ ವ್ಯಕ್ತಿಯು ರೋಬೋಟ್‌ನ ಸೆನ್ಸಾರ್ ಪರೀಕ್ಷೆ ಮಾಡಲು ಅದರ ಬಳಿ ಹೋಗಿದ್ದ. ಈ ವೇಳೆ ಅನಾಹುತ ಸಂಭವಿಸಿದೆ ಎಂದು ಸಂಸ್ಥೆ ವಿವರಿಸಿದೆ.
ಎರಡು ದಿನಗಳ ಹಿಂದೆ ರೋಬೋಟ್‌ನ ಸೆನ್ಸಾರ್‌ನಲ್ಲಿ ಸಮಸ್ಯೆ ಇರೋದು ಕಂಡು ಬಂದಿತ್ತು. ಹೀಗಾಗಿ, ಸೆನ್ಸಾರ್ ಪರೀಕ್ಷೆ ಮಾಡಲು ರೊಬೋಟಿಕ್ ಸಂಸ್ಥೆಯ ನೌಕರನಾಗಿದ್ದ ಮೃತ ವ್ಯಕ್ತಿಯನ್ನು ಕರೆಸಲಾಗಿತ್ತು ಎಂದು ತಿಳಿದು ಬಂದಿದೆ.
ರೊಬೋಟ್ ದಾಳಿಯಿಂದ ಗಂಭೀರವಾಗಿ ಗಾಯಗೊಂಡಿದ್ದ ವ್ಯಕ್ತಿಯನ್ನು ಕೂಡಲೇ ಆಸ್ಪತ್ರೆಗೆ ರವಾನಿಸಲಾಯಿತಾದ್ರೂ, ಆತ ಆಸ್ಪತ್ರೆ ತಲುಪುವ ಮುನ್ನವೇ ಸಾವನ್ನಪ್ಪಿದ್ದಾನೆ ಎಂದು ವೈದ್ಯರು ಘೋಷಿಸಿದ್ದರು. ಈ ಘಟನೆಯನ್ನು ರೋಬೋಟಿಕ್ ಸಂಸ್ಥೆ ಹಾಗೂ ರೊಬೋಟ್ ಅಳವಡಿಕೆ ಮಾಡಿದ್ದ ಕೃಷಿ ಉತ್ಪನ್ನ ಮಾರಾಟ ಸಂಸ್ಥೆಯು ಆಘಾತಕಾರಿ ಎಂದು ಹೇಳಿವೆ. ಸಾಮಾನ್ಯವಾಗಿ ರೋಬೋಟ್‌ಗಳನ್ನು ಅತ್ಯಂತ ಸುರಕ್ಷಿತ, ಚಾಣಾಕ್ಷ್ಯ ಹಾಗೂ ಪರಿಣಾಮಕಾರಿ ಯಂತ್ರ ಎಂದು ಭಾವಿಸಲಾಗುತ್ತದೆ. ಆದರೆ, ರೋಬೋಟ್ ದಾಳಿಗೆ ವ್ಯಕ್ತಿ ಬಲಿಯಾಗಿರೋದು ಕೊರಿಯಾದಲ್ಲಿ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ.
ಹಾಗೆ ನೋಡಿದ್ರೆ ದಕ್ಷಿಣ ಕೊರಿಯಾ ದೇಶದಲ್ಲಿ ಒಂದೇ ವರ್ಷದಲ್ಲಿ ನಡೆದ ಎರಡನೇ ಘಟನೆ ಇದಾಗಿದೆ. ಕಳೆದ ಮಾರ್ಚ್‌ನಲ್ಲಿ ರೋಬೋಟ್ ದಾಳಿಯಿಂದ 50 ವರ್ಷ ವಯಸ್ಸಿನ ವ್ಯಕ್ತಿಯೊಬ್ಬರು ಗಂಭೀರವಾಗಿ ಗಾಯಗೊಂಡಿದ್ದರು. ಆಟೋಮೊಬೈಲ್ ಬಿಡಿ ಭಾಗಗಳ ತಯಾರಿಕಾ ಘಟಕದಲ್ಲಿ ರೋಬೋಟ್ ಕಾರ್ಯ ನಿರ್ವಹಿಸುವ ವೇಳೆ ಈ ಘಟನೆ ನಡೆದಿತ್ತು.
