ವರದಿ : ಬಿ.ಎಸ್.ಆಚಾರ್ಯ
ಬ್ರಹ್ಮಾವರ : ಕೊರೋನಾ ಸಂಕಷ್ಟದ ಈ ಸಂದರ್ಭದಲ್ಲಿ ಹಲವು ಜೀವಗಳು ನೆರವಿನ ಹಸ್ತ ಚಾಚುತ್ತಿವೆ. ಹಲವಾರು ಸಂಘ-ಸಂಸ್ಥೆಗಳು ಬಡವರ ಕಷ್ಟಕ್ಕೆ ಮಿಡಿಯುತ್ತಿವೆ. ಈ ನಡುವೆ ಫೇಸ್ಬುಕ್ ಮೂಲಕ ಬಾರ್ಕೂರಿನ ತಂಡ ಮಾನವೀಯತೆ ಮೆರೆಯುತ್ತಿದೆ. `ನಮ್ಮೂರು ಬಾರ್ಕೂರು’ ಫೇಸ್ ಬುಕ್ ಪೇಜ್ ಮೂಲಕ ಕಳೆದ ಬಾರಿ 650 ಕ್ಕೂ ಹೆಚ್ಚಿನ ಮನೆಗಳಿಗೆ ಆಹಾರ ಸಾಮಾಗ್ರಿಗಳ ಕಿಟ್ ವಿತರಿಸಿತ್ತು ತಂಡ. ಈ ಬಾರಿಯೂ
ಗ್ರೂಪಿನಲ್ಲಿ ಇರುವ ದಾನಿಗಳ ನೆರವಿನಿಂದ ಸುಮಾರು ಎರಡು ಲಕ್ಷ ರೂಪಾಯಿಗಳನ್ನು ಬಾರಕೂರು ಪರಿಸರದಲ್ಲಿ ಸಂಕಷ್ಟದಲ್ಲಿರುವ ಸುಮಾರು 50 ಕುಟುಂಬಗಳಿಗೆ ತಲಾ ರೂ. 4000 ದಂತೆ ವಿತರಿಸಲಾಗಿದೆ. ಆಲ್ವಿನ್ ಅಂದ್ರಾದೆ, ಗಣೇಶ್ ಶೆಟ್ಟಿ, ಆನಂದ್ ಕುಮಾರ್ , ಹರೀಶ್ ಆಚಾರ್ಯ , ಸವಿತಾ ಫುಟಾರ್ದೋ, ಹೇಮಂತ್ ಶ್ರೀಯಾನ್ , ಉದಯ್ ಪೂಜಾರಿ ಬಾರಕೂರು ಇವರೆಲ್ಲರೂ ಸೇರಿ ಈ ಒಂದು ಕಾರ್ಯಕ್ರಮ ಸಂಘಟಿಸುವುದರೊಂದಿಗೆ ಮನೆಗಳಿಗೆ ತೆರಳಿ ಧನಸಹಾಯ ವಿತರಿಸಿದ್ದಾರೆ.
ಪ್ರಚಾರವಿಲ್ಲ…ಫೋಟೋ ಗುಂಗಿಲ್ಲ
'ನಮ್ಮೂರು ಬಾರ್ಕೂರು' ಫೇಸ್ಬುಕ್ ಗ್ರೂಪ್ ಕಾರ್ಯ ನಿರ್ವಾಹಕರ ಮನವಿಗೆ ಸ್ಪಂದಿಸಿ ಸಕಾಲದಲ್ಲಿ ದಾನಿಗಳು ಸ್ಪಂದಿಸುತ್ತಿರುವುದರಿಂದ ಸಮಾಜಿಕ ಕಾರ್ಯ ಮೆರೆಯುವಲ್ಲಿ ಈ ಗ್ರೂಪ್ ಸಫಲವಾಗುತ್ತಿದೆ. ಮತ್ತೊಂದು ಗಮನಾರ್ಹ ಸಂಗತಿ ಎಂದರೆ ಈ ಗ್ರೂಪ್ ಗೆ ಫೋಟೋದ ಗುಂಗಿಲ್ಲ..ಪ್ರಚಾರ ಬೇಕಿಲ್ಲ..ನಿಸ್ವಾರ್ಥ ಸೇವೆಯಷ್ಟೇ ಇವರ ಕಾಯಕ. ನೇರವಾಗಿ ಹೋಗಿ ಸಂಕಷ್ಟದಲ್ಲಿರುವವರ ಮನೆ ಬಾಗಿಲಿನ ಕದ ತಟ್ಟಿ ನೆರವಾಗುತ್ತಿದೆ ಈ ತಂಡ. ಇವರ ಕಾರ್ಯ ಹೀಗೆ ಮುಂದುವರೆಯಲಿ...ಇತರರಿಗೂ ಸ್ಪೂರ್ತಿಯಾಗಲಿ ಎಂಬುದು 'ದಿಕ್ಸೂಚಿ ನ್ಯೂಸ್’ ಆಶಯ.
